4.9.07

Pharmacy Errors

ويتوالى مسلسل الأخطاء المهنية في أكثر المهن تعلقا بحياة الإنسان وهى( الصيدلة ) حتى في الولايات المتحدة أكثر البلاد امنا وتقدما

الصيدلية .. المكان الأوحد الذي لا يختلف عليه اثنان في وظيفته ومهمته في التوفير الآمن للدواء , ولكن عندما يكون الهدف هو التوسع والإنتشار وفتح سلاسل من تلك الصيدليات يتلاشي شيئا فشيئا ذلك الدور التى تقوم به تلك المؤسسة ويتراجع ايضا شيئا فشيئا تلك الثقة الموروثة بين المريض وبين من يرتدون البلاطى البيضاء الذى من المفترض انه صيادلة في تلك المؤسسات

----------

بالصدفة وانا بدور ع النت لقيت حلقة 20/20 بتتكلم عن أخطاء الصيدليات فشديتنى انى اشوفها , وللأسف شفت بجد حاجات تحزن , حتى في أكبر سلاسل الصيدليات العالمية . يظهر ان حياة الناس بقت رخيصة اليومين دول . وطبعا في الدول المتقدمة الدوا مش بيتباع زى عندنا ومتغلف من الشركة وكده , لأ ده بيتغلف في الصيدليات وبيكتب عليه الـغلاف بتاعه



  • لقيت مثلا حالة أليكساندرا طفلة الـ 8 سنوات وهى دلوقتى لا تقدر تمشي ولا تتكلم ولا تعتمد على نفسها , عارفين ده كله ليه ؟؟ , أليكساندرا كانت ليها روشتة ( فينو باربيتال ) بس الدوا اللى جاى من الصيدلية ماكنش هو ده كان ( دوا سكر ) بس بعد ايه بقى بعد سبع اسابيع لما اكتشفوا ان الدوا غلط


  • الحالة الثانية كانت حالة سرطان ثدى وقبل ما تبدئ العلاج الكيماوى كان الدكتور كاتبلها كيومادين وهو مضاد للتجلط بس كانت الجرعة 1 ملجم بس اللى حضر الروشتة حضر 10ملجم مش 1 ملجم , أخطاء مهياش بسيطة أبدا

----------


وفي اختبار بسيط عملوه في 25 صيدلية جربوا انهم يصرفوا الأسبرين مع روشتة الكيومادين , المفروض طبعا انهم ما يصرفوش مع بعض أبدا لأن بينهم تفاعلات خطيرة جدا , لقوا 8 صيدليات بس هى الى حذرتهم من خطورة الدوايين من بعض وان 17 صيدلية صرفت الدوايين عادى مع بعض . المشكلة فعلا ان في آلاف الروشتات بيحضرها مش صيدلى , لأ ده مساعد أو فنى صيدلى وفي في الغالب ما بيبقاش عنده اى خبرة بالدوا ولا تفاعلاته


----------


أسيبكم دلوقتى بقى مع حلقة


20/20's Story on pharmacy errors




9 comments:

marmora said...

رائــــــــــــع جداجدا ..
ان شاء الله اشوف الفيديوهات وقت تاني نظرا لان النت دلوقتي بطئئئئئئئئئئ
الموضوع دة ممتاز جداومايطلعش غير من حضرتك ربنا يكرمك :)

Ph.Hamada said...

Marmora
شكرا د.مرمورة على كل الثناء الجميل ده , بجد انت شجعتينى جدا , بس برده هبقى مبسوط اوى لو حضرتك شفتى الحلقة , لأنها بجد ليها احساس تانى لما تسمعى عن لما تقرأى وهى ع العموم مش طويلة , ده يادوب ربع ساعة

:)

memo said...

موضوع مهم جدا د. حماده
فعلا الاخطاء دى حاجه بشعه ممكن تضيع حياة ناس ابرياء كل ذنبهم انهم وثقوا فى الدكتور
وكل يوم بنسمع ونقرى كتير عن الاخطاء دى ونشوف الضحايا بس فى الولايات المتحده اول مره اعرف ان عندهم هناك اخطاء كده
بالنسبه بقى للفيديوهات مش عارفه اشوفها الكلام بيقطع بيحمل وانا مشغالاه هبقى احاول معاها تانى

break said...

انا بردو مش عارفة اشوف الفيديوهات مرة واحدة
الكمبيوتر ميستحملش الصدمة دى
:(
انا كنت بفكر اتدرب فى صيدلية
كدا شلت الفكرة من دماغى خالص
ربنا يكرمك
وان شاء الله يكون ليك مستقبل فى الصيدلة :)
و مبروك البلوج

Ph.Hamada said...

Amany
اهلا بك د.امانى بعد طول غيبة , بالنسبة للأخطاء المهنية بقت زى الورم الخبيث بيتوغل في كل حاجة , لو حد راعى ضميره شوية وهو بيشتغل , ماكنتش حصلت اخطاء كتيرة , لأنها فعلا اخطاء قد تكون قاتلة بعض الشىء , وبالنسبة للفيديوهات هى عاوزة وقت كون النت فيه حلو عشان مشكلة التقطيع ده مشكلة نت

Break
اهلا بك د.بريك في البلوج ويارب يكون عجبك , بس بالنسبة للتدريب ماتشيلهوش من دماغك خالص لأنك مشروع صيلانية , انا طول الموضوع بتكلم عن الأخطاء اللى كترت بسبب كثرة اعتمادنا على الأسيستانت اللى في الغالب بيكون دبلوم او تعليم متوسط وللأسف ده حتى عندنا في مصر سبب مشاكل كتيرة , وبالنسبة برده للفيديوهات فهى شغالة بس بتبقى بطيئة وقت ما النت بيكون تقيل

sa'7so'7te said...

ايه ده كله
ده الواحد يبطل يشترى ادوية
و يسيب المناعة تشتغل لوحدها احسن
:)
مبروك على البلوج الجديد

Ph.Hamada said...

sa'7so'7te
اهلا وسهلا بيكى يا دكتورة في البوج ويارب يكون عجبك , هو صحيح مفيهوش كتير , بس ربنا يوفقنا واكمله ان شاء الله, بس المقصود من البوست مش اننا نبطل نروح الصيدلية , المقصود اننا كصيادلة ننتبه شوية اننا بنتعامل مع حياة ناس , والتفاته برده للمشاكل الناتجة عن الاسيستانت وكثرة الاعتماد عليه في مكان زى الصيدليات .

وأهلا وسهلا بيكى مرة تانية يا دكتورة ومنورة البلوج :)

Unknown said...

شكرا د.حماده
بجد عندك حق في كل كلمه قلتها دلوقتي الناس بقى همها الربح المادي فقط دون الاعتبار باي شيئ اخر
وفعلا الاعتماد على الاسيستانت وانه عارف الادويه وعارف مثلا نطلع في ال case ده ايه وكده خلاص بقى يمكن الاعتماد عليها لدرجة انه بيثق فيها اكتر من الدكاتره
ربنا يستر علينا بجد ونكون صيادله بالمعنى الحقيقي
شكرا د.حماده على الموضوع الجدير بالنقاش ده

Ph.Hamada said...

Dr.Shimaa
نورتى البوست والبلوج كله د.شيماء , للأسف اللى بنتكلم عليه حقيقة مؤكدة , وللأسف برده اللى بيدفع الثمن هو المريض او بلغة السوق المادى (العميل), بجد فعلا ربنا يستر علينا كصيادلة

ربنا يستر :(