17.9.07

Prsnt TAG


تاج الود


صباح الخير .. في احدى الليالى الجميلة وانا بتصفح احدى المواقع المميزة بالنسبة لى لقيت مفاجأة جميلة جدا لم تكن لى بالحسبان , تاج جميل اوى , اتبعتلى من حيث لا ادرى ولا اعلم من د.شيماء ( نبضة قلب ) , وبعديها بكام يوم لقيت د.محمد ( ذكرى انسان ) بيبعتلى نفس التاج , بصراحة انا مش عارف اوصفلكم فرحى ازاى بالتاج ده , ربنا يكرمهم يارب , وطبعا علطول روحت اجيب التاج وقررت انى اسميه تاج الود , لأن اللى بيجمعنا كلنا مع بعض هو الود الى بدعى ربنا انه يدوم بينا ( شلة الجمعية العلمية ) علطول بإذن الله

اسم مدونتك ؟ ولماذا اخترته وما هي نيتك من وراء اختيارة ؟
Creative Mind - العقل المبدع
اخترته لما حسيت اننا بنفتقد كثيرا لمثل هذا العقل و لارادة الابداع , لما حسيت اننا واقفين في مكانا بقالنا سنين ومش عاوزين نتحرك , لما بقانا بنذاكر للامتحان , لما بقينا بنشتغل بس عشان لازم نشتغل مش لأننا حابين الشغل بتاعنا , فقررت انى اهتم شوية بالابداع وخصوصا في مجال شغلى وفي مهنتى اللى انا بعشقها من قبل ما اشتغلها
هل فكرت في اغلاق مدونتك والسبب ؟
على الاطلاق , مدونتى هى من احدى طرقى على العالم الخارجى , وسيلتى للتعبير عن نفسي واحلامى ومعتقداتى , يبقى ازاى اقدر اقفلها
صورتك في المدونة ورمزيتها ؟؟
صورتى هى صورتى الشخصية , فلا رمزية لها
لماذا دخلت في عالم التدوين من الاساس؟؟
زى ماقلت قبل كده برده , علشان اعبر عن نفسي وعن احلامى , واقول كل اللى جوايا
جمله قيلت لك في وصف مدونتك؟
كتير الحمد لله , واكتر حاجة بحبها وبتأثر فيا لما حد بيقولى ربنا يكرمك , بجد كلمتين اختزلوا كل المعانى الجميلة
التعليقات بالنسبة لك اهميتها؟؟
مهمة جدا جدا , لأنى بيها بحس بالتواصل بينى وبين زوارى وبقيس بيها مدى تأثير الموضوع على الناس ومدى احساس الناس بالمصداقية في كلامى
احلي بوست كتبته ضع الينك ثم اذكر لماذا ؟؟
انا لسه في الاول خالص , يعنى لسة ماكتبتش حاجات كتير اقدر افرق بينهم , لكن بجد اكتر حاجة جميلة حصلتلى هى تاج الود ده
افضل بوست قرأته وضع لينكه؟؟
ياه .. كتير اوى .. الدنيا لسه بخير .. والموهوبين لسه موجودين
افضل مدونة قرأتها؟؟
والله اللى قريته من مدونات قليل لغاية دلوقتى على اساس انى لسه جديد في المجال ده بس فيه ناس موهوبة بجد يعنى مثلا : بحب اقرا حاجات عمرو صبحى ( بجد عمرو موهوب جدا بسم الله ماشاء الله) - بحب كمان اقرا لـ ص.شيماء شحاته ( دكتورة شيماء بتحب تكتب اللى جواها وكلامها تحس فيه كده ببصمة خاصة وبرده دكتورة مروة بس مش عارف هيا ليه كتاباتها نادرة اوى ) - وطبعا الورد كله عند محبيه ( د.سارة و د.امانى ربنا يوفقهم مدونة جميلة جدا وده اكيد طبعا لأن اللى بيخرج من القلب لازم يوصل للقلب ) - نيجى بقى لحكاية غريبة كده , حكاية الستة بتوع صيدلة , دول بجد ربنا يكرمهم , مع انهم مالهومش في عالم التدوين فترة طويلة , لكن قدروا يحققوا نسبة انتشار عالية جدا بيكتبوا كل اللى بيحسوا بيه وتقريبا هما كتاب مفتوح لكل اللى حواليهم , ربنا يكرمهم
أسوا بوست واسوأ مدونة؟؟
زى مافيه الحلو اكيد طبعا فيه الوحش , بس انا هحجز المكان هنا علشان لو لقيت حاجة وحشة احطها هنا
حد قل أدبه فى التعليق إيه رد فعلك؟؟
هيبقى قدامى ساعتها حل من اثنين يا اما ارد عليه وساعتها هيكون ردى قاسي اوى بس طبعا مش هستخدم نفس اسلوبه , يا اما هريح دماغى واحذف الرد
حيحصل ايه لأيميلك لما تموت؟؟
أكيد يعنى مش هيتوزع على الورثة , ربنا يرحمنا جميعا ساعتها
اديت الباسورد لمين؟؟ وكانت ايه طبيعه علاقتك بيه؟
لا احد
اسمك؟؟
احمد
المشهور بيه وسط اصحابك؟؟؟
حاجات كتير , منهم , حماده
شخصيتك نوعها ايه ؟؟
عقلانى الى حد ما , يعنى مش متهور ومش بتاع مشاغبة , الثبات الانفعالى عندى قليل , يعنى ممكن اتحول لبركان هائل من الثورة في دقائق , حالم الى ابعد الحدود , وربنا يكرمنى واقدر احقق احلامى
السفر بالنسبة ليك؟؟
شئ جميل بس مش دايما
وقت فراغك بتعمل فيه ايه ؟؟
طبعا في المقام الاول ببقى قدام الكمبيوتر , بحب المشي جدا , يعنى معنديش مانع اخرج مع صحابي ونفضل ماشيين خمس ست ساعات , وساعات بقعد مع نفسي بالساعات افكر فى كل حاجة خاصة بي
المود بتاعك ؟
غالبا هادى ومبسوط , طبعا طوال اليوم الواحد بيتقلب من الهدوء للغضب ومن السعادة للحزن , ده شئ طبيعى
الصفات الي اخدتها من بابا ؟؟
الأمانة ويارب اقدر اخد منه اصراره
الصفات الي اخدتها من ماما ؟؟
الحب والطيبة والأمل
اكتر ست حاجات بكرها؟؟
اشمعنى سته يعنى :) , المهم , بكره كل حاجة ماشية غلط , و بكره الكره
اكتر ست حاجات بحبها ؟؟
برده سته :) , بحب الحب , وبحب الخير , وبحب العدل , وبحب الصيدلة :)
الانترنت بالنسبة ليك ؟؟
صديق قريب
اكلتك المفضلة ؟؟
والله كل الأكل نعمة , لكن يا سلام لو شفت قدامى فطيرة بقى من بتوع البلد دول اللى بيبقوا غرقانين في السمنة , أكله مش صحية خالص , بس اعمل ايه بقى , بحبها :)
الشغل بيمثلك ايه ؟؟
باختصار , حياتى , وكيانى , ووجودى
امرره لمين ؟
د.أمانى - Roses
شلة الأصدقاء - FRIENDS 4 EVER

11 comments:

shimaa said...

اولا انا اتبسط اوي لما لاقيت اسم التاج تاج الود بجد قد ايه اسم جميل ورقيق اوي:)
وربنا يديم الود مابينكم على طول ان شاء الله :)
استمتعت اوي وانا بقرا اجاباتك
وهدعيلك في الاخر بالدعوه اللي بتحبها ربنا يكرمك يارب وان شاء الله تحقق كل اللي بتتمناه :)

AmR said...

الراجل ده بيحب المشي أوي
اسألوني أنا :D

ماشاء الله شخصية هادئة ورزينة وراجل أوي
ربنا يديم الود .

sa'7so'7te said...

الاول ربنا يكرمك على الردود دى
:)
تانيا باه انا هعزمك على فطيرة بتنقط سمنة بلدى يا سيدى عشان ماتقولش علينا منايفة
تالتا ربنا يكرمك برضه على الكلام الجميل اللى قلته علينا ده احنا اتغرينا فى نفسنا
رابعا بأه مين ده اللى بيحب صيدلة

Queen Of Roses said...

ماشاء الله إجابات حضرتك جميلة جدا.. ربنا يكرمك :)
و الكلام الحلو اللي عن مدونتا ده .. مش عارفة أشكرك إزاي عليه ......

شكرا على التاج .. هو كان جالنا مرة من حبايبنا الستة بتوع صيدلة بس لسه مكسلين نجاوبه
شكلها كده أماني هتدبس فيه و تجاوبه لوحدها

Ph.Hamada said...

Dr.Shimaa
د.شيماء انا اللى اتبسطت كتير والله بمرورك على البلوج , وربنا يديم الود مابينا كلنا ان شاء الله , وشكرا جدا على الدعوة , انا كده مش عايز حاجة تانى خالص :)

AmR
ايه ده يا عمرو , يعنى ايه بقى اسألونى أنا ده :) , هو انت لسه شوفت حاجة , على العموم انا مبسوط كتير لأنى شوفتك في البلوج عندى , وربنا يديم الود ان شاء الله يا حبيبي :)

Ph.Hamada said...

Sa'7so'7te
اولا بقى يا دكتورة الكلام اللى انا قلته فيكم حقيقة اوى , يعنى انا بجد مش بجاملكم لأنكم بجد عملتم سمعة جميلة ربنا يوفقكم وتكملوا ان شاء الله , ثانيا بقى انتم لو قعدتكم في الكلية ده شوية كمان هتحبوها اكتر منى كمان ولو كنتم حابين مجال شغلكم يبقى اكيد هتحبوا مجال دراستكم , صح , هو كلنا مابنحبش الدراسة , لكن بجد انا بحب المهنة بتاعتى اوى عشان كده حابب الكلية , وبالنسبة بقى للفطيرة انا قبلت العزومة , بس قولولى بقى هتبقى امتى :)

Ph.Hamada said...

Queen Of Roses
د.سارة انتم بجد تستاهلوا كل الكلام ده , بجد ربنا يوفقكم , وبعدين ده مش عاوز شكر ولا حاجة , انا بقول حاجة انا حاسيسها وشايفها حقيقة قدامى .

وبالنسبة للتاج , هو اينعم تدبيسة , بس بجد تدبيسة حلوة , انا شايف برده ان د.أمانى شكلها كده هتدبس فيهم , بس برده ابقى ساعديها شوية :)

ربنا يوفقكم

ِAmany said...

اجاباتك كلها جميله يا د. حماده

وانا متشكره جدا على التدبيسه دى هى فعلا جميله

وكمان على الكلام الرقيق اللى عن مدونتنا

Ph.Hamada said...

Amany
لا شكر على التدبيسة يا د.امانى , لأنها اصلا اجبارى مش اختيارى :)

والكلام الرقيق ده حقيقة , ولا يجب كتمانها :)

ذكرى إنسان said...

حقيقي يا حماده ، لقد شرفت بمعرفتك ولا زلت و سأظل أتشرف بها
تحياتي يا جميل

Ph.Hamada said...

ذكرى انسان
انا والله يا د.محمد اللى زادنى شرف انى اتعرف بيك , وبجد انا كان نفسي اعمل كده من زمان , ومش مجاملة والله لو قلتلك انك بجد المثل الأعلى بتاعنا في كل حاجة , ربنا يكرمك ويوفقك يا حبيبي