Prsnt TAG

تاج الود

صباح الخير .. في احدى الليالى الجميلة وانا بتصفح احدى المواقع المميزة بالنسبة لى لقيت مفاجأة جميلة جدا لم تكن لى بالحسبان , تاج جميل اوى , اتبعتلى من حيث لا ادرى ولا اعلم من د.شيماء ( نبضة قلب ) , وبعديها بكام يوم لقيت د.محمد ( ذكرى انسان ) بيبعتلى نفس التاج , بصراحة انا مش عارف اوصفلكم فرحى ازاى بالتاج ده , ربنا يكرمهم يارب , وطبعا علطول روحت اجيب التاج وقررت انى اسميه تاج الود , لأن اللى بيجمعنا كلنا مع بعض هو الود الى بدعى ربنا انه يدوم بينا ( شلة الجمعية العلمية ) علطول بإذن الله

اسم مدونتك ؟ ولماذا اخترته وما هي نيتك من وراء اختيارة ؟

Creative Mind - العقل المبدع

اخترته لما حسيت اننا بنفتقد كثيرا لمثل هذا العقل و لارادة الابداع , لما حسيت اننا واقفين في مكانا بقالنا سنين ومش عاوزين نتحرك , لما بقانا بنذاكر للامتحان , لما بقينا بنشتغل بس عشان لازم نشتغل مش لأننا حابين الشغل بتاعنا , فقررت انى اهتم شوية بالابداع وخصوصا في مجال شغلى وفي مهنتى اللى انا بعشقها من قبل ما اشتغلها

هل فكرت في اغلاق مدونتك والسبب ؟

على الاطلاق , مدونتى هى من احدى طرقى على العالم الخارجى , وسيلتى للتعبير عن نفسي واحلامى ومعتقداتى , يبقى ازاى اقدر اقفلها

صورتك في المدونة ورمزيتها ؟؟

صورتى هى صورتى الشخصية , فلا رمزية لها

لماذا دخلت في عالم التدوين من الاساس؟؟

زى ماقلت قبل كده برده , علشان اعبر عن نفسي وعن احلامى , واقول كل اللى جوايا

جمله قيلت لك في وصف مدونتك؟

كتير الحمد لله , واكتر حاجة بحبها وبتأثر فيا لما حد بيقولى ربنا يكرمك , بجد كلمتين اختزلوا كل المعانى الجميلة

التعليقات بالنسبة لك اهميتها؟؟

مهمة جدا جدا , لأنى بيها بحس بالتواصل بينى وبين زوارى وبقيس بيها مدى تأثير الموضوع على الناس ومدى احساس الناس بالمصداقية في كلامى

احلي بوست كتبته ضع الينك ثم اذكر لماذا ؟؟

انا لسه في الاول خالص , يعنى لسة ماكتبتش حاجات كتير اقدر افرق بينهم , لكن بجد اكتر حاجة جميلة حصلتلى هى تاج الود ده

افضل بوست قرأته وضع لينكه؟؟

ياه .. كتير اوى .. الدنيا لسه بخير .. والموهوبين لسه موجودين

افضل مدونة قرأتها؟؟

والله اللى قريته من مدونات قليل لغاية دلوقتى على اساس انى لسه جديد في المجال ده بس فيه ناس موهوبة بجد يعنى مثلا : بحب اقرا حاجات عمرو صبحى ( بجد عمرو موهوب جدا بسم الله ماشاء الله) - بحب كمان اقرا لـ ص.شيماء شحاته ( دكتورة شيماء بتحب تكتب اللى جواها وكلامها تحس فيه كده ببصمة خاصة وبرده دكتورة مروة بس مش عارف هيا ليه كتاباتها نادرة اوى ) - وطبعا الورد كله عند محبيه ( د.سارة و د.امانى ربنا يوفقهم مدونة جميلة جدا وده اكيد طبعا لأن اللى بيخرج من القلب لازم يوصل للقلب ) - نيجى بقى لحكاية غريبة كده , حكاية الستة بتوع صيدلة , دول بجد ربنا يكرمهم , مع انهم مالهومش في عالم التدوين فترة طويلة , لكن قدروا يحققوا نسبة انتشار عالية جدا بيكتبوا كل اللى بيحسوا بيه وتقريبا هما كتاب مفتوح لكل اللى حواليهم , ربنا يكرمهم

أسوا بوست واسوأ مدونة؟؟

زى مافيه الحلو اكيد طبعا فيه الوحش , بس انا هحجز المكان هنا علشان لو لقيت حاجة وحشة احطها هنا

حد قل أدبه فى التعليق إيه رد فعلك؟؟

هيبقى قدامى ساعتها حل من اثنين يا اما ارد عليه وساعتها هيكون ردى قاسي اوى بس طبعا مش هستخدم نفس اسلوبه , يا اما هريح دماغى واحذف الرد

حيحصل ايه لأيميلك لما تموت؟؟

أكيد يعنى مش هيتوزع على الورثة , ربنا يرحمنا جميعا ساعتها

اديت الباسورد لمين؟؟ وكانت ايه طبيعه علاقتك بيه؟

لا احد

اسمك؟؟

احمد

المشهور بيه وسط اصحابك؟؟؟

حاجات كتير , منهم , حماده

شخصيتك نوعها ايه ؟؟

عقلانى الى حد ما , يعنى مش متهور ومش بتاع مشاغبة , الثبات الانفعالى عندى قليل , يعنى ممكن اتحول لبركان هائل من الثورة في دقائق , حالم الى ابعد الحدود , وربنا يكرمنى واقدر احقق احلامى

السفر بالنسبة ليك؟؟

شئ جميل بس مش دايما

وقت فراغك بتعمل فيه ايه ؟؟

طبعا في المقام الاول ببقى قدام الكمبيوتر , بحب المشي جدا , يعنى معنديش مانع اخرج مع صحابي ونفضل ماشيين خمس ست ساعات , وساعات بقعد مع نفسي بالساعات افكر فى كل حاجة خاصة بي

المود بتاعك ؟

غالبا هادى ومبسوط , طبعا طوال اليوم الواحد بيتقلب من الهدوء للغضب ومن السعادة للحزن , ده شئ طبيعى

الصفات الي اخدتها من بابا ؟؟

الأمانة ويارب اقدر اخد منه اصراره

الصفات الي اخدتها من ماما ؟؟

الحب والطيبة والأمل

اكتر ست حاجات بكرها؟؟

اشمعنى سته يعنى :) , المهم , بكره كل حاجة ماشية غلط , و بكره الكره

اكتر ست حاجات بحبها ؟؟

برده سته :) , بحب الحب , وبحب الخير , وبحب العدل , وبحب الصيدلة :)

الانترنت بالنسبة ليك ؟؟

صديق قريب

اكلتك المفضلة ؟؟

والله كل الأكل نعمة , لكن يا سلام لو شفت قدامى فطيرة بقى من بتوع البلد دول اللى بيبقوا غرقانين في السمنة , أكله مش صحية خالص , بس اعمل ايه بقى , بحبها :)

الشغل بيمثلك ايه ؟؟

باختصار , حياتى , وكيانى , ووجودى

امرره لمين ؟

د.أمانى - Roses

شلة الأصدقاء - FRIENDS 4 EVER

Pharmacy Errors

ويتوالى مسلسل الأخطاء المهنية في أكثر المهن تعلقا بحياة الإنسان وهى( الصيدلة ) حتى في الولايات المتحدة أكثر البلاد امنا وتقدما

الصيدلية .. المكان الأوحد الذي لا يختلف عليه اثنان في وظيفته ومهمته في التوفير الآمن للدواء , ولكن عندما يكون الهدف هو التوسع والإنتشار وفتح سلاسل من تلك الصيدليات يتلاشي شيئا فشيئا ذلك الدور التى تقوم به تلك المؤسسة ويتراجع ايضا شيئا فشيئا تلك الثقة الموروثة بين المريض وبين من يرتدون البلاطى البيضاء الذى من المفترض انه صيادلة في تلك المؤسسات

----------

بالصدفة وانا بدور ع النت لقيت حلقة 20/20 بتتكلم عن أخطاء الصيدليات فشديتنى انى اشوفها , وللأسف شفت بجد حاجات تحزن , حتى في أكبر سلاسل الصيدليات العالمية . يظهر ان حياة الناس بقت رخيصة اليومين دول . وطبعا في الدول المتقدمة الدوا مش بيتباع زى عندنا ومتغلف من الشركة وكده , لأ ده بيتغلف في الصيدليات وبيكتب عليه الـغلاف بتاعه

• 
  
  لقيت مثلا حالة أليكساندرا طفلة الـ 8 سنوات وهى دلوقتى لا تقدر تمشي ولا تتكلم ولا تعتمد على نفسها , عارفين ده كله ليه ؟؟ , أليكساندرا كانت ليها روشتة ( فينو باربيتال ) بس الدوا اللى جاى من الصيدلية ماكنش هو ده كان ( دوا سكر ) بس بعد ايه بقى بعد سبع اسابيع لما اكتشفوا ان الدوا غلط


• 
  
  الحالة الثانية كانت حالة سرطان ثدى وقبل ما تبدئ العلاج الكيماوى كان الدكتور كاتبلها كيومادين وهو مضاد للتجلط بس كانت الجرعة 1 ملجم بس اللى حضر الروشتة حضر 10ملجم مش 1 ملجم , أخطاء مهياش بسيطة أبدا

----------

وفي اختبار بسيط عملوه في 25 صيدلية جربوا انهم يصرفوا الأسبرين مع روشتة الكيومادين , المفروض طبعا انهم ما يصرفوش مع بعض أبدا لأن بينهم تفاعلات خطيرة جدا , لقوا 8 صيدليات بس هى الى حذرتهم من خطورة الدوايين من بعض وان 17 صيدلية صرفت الدوايين عادى مع بعض . المشكلة فعلا ان في آلاف الروشتات بيحضرها مش صيدلى , لأ ده مساعد أو فنى صيدلى وفي في الغالب ما بيبقاش عنده اى خبرة بالدوا ولا تفاعلاته

----------

أسيبكم دلوقتى بقى مع حلقة

20/20's Story on pharmacy errors