13.7.08

تاج النفس

تاج النفس




التاج ده جالى من د.شيماء ( نبضه قلب ) , ربنا يكرمها , فعلا تاج حلو اوى اوى , حسيت انى فى قعده صفا مع نفسي كان نفسي فيها من زمان اوى . شكرا د.شيماء


ودلوقتى اسيبكم مع تاج النفس
اكتب عشر اشياء عن نفسك



اولا , وده حاجه بديهيه اوى , ان انا اسمى احمد سمير , اكيد ده حاجه معروفه . مواليد شهر مايو سنه 88 , على فكره كان فى رمضان ساعتها


ثانيا , انا عشت حوالى 12 سنه من عمرى بره مصر , ومدرستش ولا سنه فى مصر , وده حاجه انا بفخر بيها والحمد لله , لأن الريتم هنا فى مصر بصراحه لا يطاق


ثالثا , انا عشت فى بيت محب اوى ومترابط جدا وعامر دينيا بشكل رائع , واتربيت على مبادئ وقيم ومثل وثوابت معينه , اتمنى من رب العالمين انى اقدر ازرعها فى عقول ونفوس اولادى ان شاء الله


رابعا , انا بحب اوى مهنه الصيدله , عاشق للجانب العملى فيها , وده والحمد لله وراثه من والدتى اللى هى اكيد طبعا صيدلانيه خريجه طنطا . تشربت حب المهنه ده منها اوى وانا الآن اشتاق بجد لليوم اللى يتكتب فيه فى بطاقتى لقب صيدلى


خامسا , والدى بقى ده راجل انا بحبه وبحترمه جدا جدا , مهما قدرت اوصف مش هقدر اوفيه حقه . كفايه انه ربانا على الاخلاق والدين السليم . راجل انا بحترم فيه كفاحه انه يكون حاجه مختلفه عن آلاف الخريجين اللى بيتخرجوا كل سنه . كافح واتغرب وسافر برده اربع سنين بدون اى تمويل مادى من اهله لان جدى الله يرحمه ساعتها كان راجل كبير على المعاش . بس سافر ودرس الدكتوراه فى القانون الجنائى من جامعه روما بايطاليا . نفسي والله انى ابقى حاجه من الراجل ده


سادسا , انا اكبر اخواتى , عندى اخت اصغر منى بسنه واحده واخ اصغر منى بست سنين , وهو ده آخر العنقود , المشكله ان الواد محمد ده هيطلع اطول منى , ههههه


سابعا , اهم مميزاتى انى عندى حب استطلاع وفضول على الحاجات الجديده وعندى الصبر انى اقعد وادور وابحث حتى لو كنت مطبق الليل زى دلوقتى كده فى سبيل تحقيق هدفى


ثامنا , اهم عيوبى , التردد , وغالبا اكثر المواقف اللى بتقابلنا فى حياتنا بتبقى محتاجه قرار سريع ومباشر وفورى بدون تردد , ده عيب فيا ادعولى انى اقدر اعالجه


تاسعا , انا انسان محب اوى اوى , لما بحب بحب بجد , ولما بكره بكره بجد . المهم انا بحب لدرجه مش معقوله , وبغير جدا جدا على اللى بحبه لدرجه مش معقوله برده حتى من نسمه الهوا اللى معديه عليه . المهم برده , بقدس حاجه اسمها الحياه الاسريه , ونفسي اخلف بنوته زى القمر وولد زى الصقر , نفسي اعلمهم واربيهم على كل المبادئ والقيم والاصول اللى اتربيت عليها , نفسى اربيهم صح علشان يدعولى بالرحمه والمغفره بعد ما اموت


عاشرا , انا انسان يرى المستقبل برؤيته الخاصه , ويارب اقدر احقق كل اللى بحلم احققه , او على الاقل لما اموت مبقاش مت من غير ما اعمل اى خطوه فى املى الكبير اللى بحلم بيه , لأنى مقتنع ان اللى بيعيش حياته زى ما تيجى من غير تخطيط ومن غير اهداف , مفيش فرق كبير بينه وبين اى حيوان , لا مؤاخده , ده وجهه نظرى


بس كده

:)


انا بجد مبسوط اوى اوى , انى طلعت كل اللى جوايا . الحمد الله


ودلوقتى جه ميعاد تمرير التاج طبعا


Roses - د.امانى ود.ساره

لازم تجاوبوا التاج , ده اجبارى على فكره :)


Magdy Gomha - حبيب قلبى مجدي

رد يا واد يا ابو الامجاد على التاج ده


Koko City - حلوجى حبيبي

انا عارف انك مش فاضى ومبتفتحش البلوج تقريبا

بس برده لازم ترد :)








شكرا جزيلا د.شيماء

نردهالك فى الافراح ان شاء الله

4 comments:

Rehab said...

مش قلت كتير يعنى
هو انت حكيت عن الماضى و المستقبل
:)
عموما انت تستاهل كل خير
تحياتى

shimaa said...

ايه ده شكلي هخليك تعيد التاج تاني :P

اولا ضيعت بتاع اربع نقط خمس نقط بنتكلم في حاجات عارفينها احنا عايزين مالم نعرفه عن احمد يعني من الاخر عايزينك تسيح لنفسك :P:D

المشكله ان الواد محمد ده هيطلع اطول منى@

:D ماله حتى عشان تبقى انت الصغير :P

. راجل انا بحترم فيه كفاحه انه يكون حاجه مختلفه عن آلاف الخريجين اللى بيتخرجوا كل سنه @

تصدق انا بحس انه كل اباءنا كافحوا اوي وكانت ظروفهم صعبه جدا ومع ذلك قدروا يقاوموا ويوفرولنا حياه كريمه ربنا يباركلنا فيهم يارب ويعينا على برهم دايما


, ونفسي اخلف بنوته زى القمر وولد زى الصقر , نفسي اعلمهم واربيهم على كل المبادئ والقيم والاصول اللى اتربيت عليها , نفسى اربيهم صح علشان يدعولى بالرحمه والمغفره بعد ما اموت@

ان شاء الله تتحقق احلامك باذن الله وبكره تقول شيماء قالت

لأنى مقتنع ان اللى بيعيش حياته زى ما تيجى من غير تخطيط ومن غير اهداف , مفيش فرق كبير بينه وبين اى حيوان , لا مؤاخده , ده وجهه نظرى@

بالضبط وعارف كمان انه الواحد يحس انه عمل حاجه في حياته قبل مايموت مش مجرد انه اتخلق في الدنيا عشان يدخل حفره في الاخر وهي القبر لا لازم يكون ليك دور ولو شيئ صغير بس تحس انك عملت حاجه :)

ربنا يكرمك يا احمد ان شاء الله وتحقق كل احلامك وفكر في موضوع اعادة التاج ده :P

Ph.Hamada said...

Rehab
فعلا يا داليا , انا محكيتش كتير لأنى بصراحه مكنتش عارف اكلم عن نفسى بتفصيل اكتر من كده . انت عارفه , اصعب سؤال تتسأليه فى يوم من الايام انك تتكلمى عن نفسك

وشكرا جزيلا على الكلام الجميل ده

ربنا يعزك :)

Ph.Hamada said...

Dr.Shimaa
اعيد التاج تانى !! , ليه بس كده , ما الطيب احسن :D

ما هو المشكله فعلا ان صعب اوى اوى اتكلم عن نفسي , ممكن حد منكم يتكلم عن احمد بالشكل اللى هو شايفه , بس ان احمد يتكلم عن احمد , ده صعب جدا :D

**
تصدق انا بحس انه كل اباءنا كافحوا اوي وكانت ظروفهم صعبه جدا ...


فعلا والله , كفايه انهم قدروا يربونا صح ويوفرولنا الحياه الكريمه , يارب نقدر نعمل كده مع ولادنا

**
بالضبط وعارف كمان انه الواحد يحس انه عمل حاجه في حياته قبل مايموت مش مجرد انه اتخلق في الدنيا عشان يدخل حفره في الاخر ...

الله يفتح عليكى , هو ده بالظبط اللى انا اقصده , ربنا ينورلك طريقك دايما كده ان شاء الله :)

ربنا يعزك د.شيماء , ويكرمك , ويهديكى دايما للصواب , ويرزقك رضاه عنك دايما ان شاء الله . بس بلاش حكايه اعيد التاج ده تانى الله يخليكى :D